14/03/2026
🚨🚨🚨🚨🚨
لو فتحت كافيه جديد ومبسوط بيه
وسألتك: إمتى تقدر تقول إن الكافيه ده بدأ يحقق ربح ؟
هتقولي: لما أبيع كثير !
هقولك: كثير دي كلمة مطاطة، اللي هو كام يعني؟
المحاسبة مفيهاش بالبركة، المحاسبة فيها أرقام واضحة
عشان تعرف إنت بتكسب إمتى بالظبط،
لازم تفهم حاجة اسمها (نقطة التعادل)
تعالى أبسطهالك بمثال الكافيه بتاعك،
وخلينا نفترض (أنك بتبيع قهوة فقط) عشان أسهلها عليك في الشرح
ركز معايا جدا من أول هنا عشان هخليك تفهم وتدعيلي:
—————————-
إنت عندك في الكافيه نوعين من المصاريف مفيش غيرهم:
1. مصاريف ثابتة:
زي (إيجار الكافيه، مرتبات العمال الأساسية .. الخ) .. دي فلوس إنت كده كده هتدفعها في كل الأحوال .. سواء بعت 1000 كوباية قهوة مثلا .. أو قفلت باب الكافيه ومبعتش ولا كوباية
هنفترض مع بعض إن المصاريف دي = 10,000 جنيه مصاريف ثابتة في الشهر
2. مصاريف متغيرة:
زي (البن، السكر، اللبن، الكوباية الورق .. الخ) .. دي فلوس ما بتتدفعش غير لما الزبون يطلب القهوة وتعملها له
هنفترض إن تكلفة الحاجات دي لكوباية القهوة الواحدة عليك = 10 جنيه تكلفة متغيرة لكل كوباية
فلو أفترضنا انك بتبيع كوباية القهوة للزبون بـ 30 جنيه (سعر البيع للكوباية)
يبقى بحسبة بسيطة:
سعر البيع (30 جنيه) - تكلفة الكوباية (10 جنيه) = 20 جنيه
الـ 20 جنيه دي اسمها في المحاسبة (هامش المساهمة).. يعني إيه؟
يعني دي الفلوس اللي بتساهم معاك عشان تسدد بيها الـ 10,000 جنيه بتاعة الإيجار والمصاريف الثابتة اللي فوق دماغك
يبقى هنا أهم سؤال:
تبيع كام كوباية عشان تسدد الـ 10,000 جنيه المصاريف الثابتة اللي فوق دماغك وتقف على أرض صلبة؟
المعادلة بسيطة جداً وهي:
نقطة التعادل =
المصاريف الثابتة ÷ هامش المساهمة للكوباية
= 10,000 جنيه ÷ 20 جنيه = 500 كوباية قهوة
يبقى الـ 500 كوباية دول هما (نقطة التعادل) بتاعتك، اللي احنا بندور عليها من الصبح ودي معناها:
إنك لو بعت في الشهر 500 كوباية بالظبط إنت كده (لا كسبان ولا خسران)، لأنك بس غطيت كل مصاريفك الثابتة والمتغيرة
ولو بعت أقل من كده في الشهر حتى لو 499 كوباية إنت كده خسران
وكل كوباية تبيعها بعد الـ500 كوباية بتبدأ تحقق منها ربح، لأنك كده تكون غطيت كل مصاريفك، وأي كوباية إضافية بعدها بتدخل فلوس في جيبك فعلًا
وطبعاً قيس على كده كل النشاطات الأخرى
عشان كده، كصاحب بيزنس أو محاسب شاطر، هدفك الأول كل شهر إنك تجري وتوصل لـ نقطة التعادل في أسرع وقت، عشان كل اللي يجي بعدها يبقى أرباحك الحقيقيه
Doz - دوز كل يوم معلومة
