22/07/2025
🎉 VIVIRÁ NOVE DÍAS DE FESTA CUN FESTIVAL “Á GALEGA” E UN CARNAVERÁN COMO PRINCIPAIS NOVIDADES
A XXIV Feira Gastronómica de Produtos Galegos concentrarase en catro días, do 31 de xullo ao 3 de agosto
Con motivo do seu 25 aniversario, a Asociación San Cayetano Arra , en colaboración co Concello de Sanxenxo, ten prevista unha ampla programación que terá como epicentro a explanada de Montalvo.
A actividade comezará este sábado, día 26, coa apertura da Feira de Artesanía e os Cantares de Taberna. O día 27, a partir das 20:30 horas, celebrarase unha das novidades desta edición, o Carnaverán, cunha exposición de traxes típicos dos entroidos máis emblemáticos de Galicia baixo a temática “Oficios e tradicións galegas”. A xornada rematará co DJ Dolce Vita.
Os días 28, 29 e 30 de xullo continuará baixo a carpa a Feira de Artesanía e as actuacións de cantautores locais. Do 31 de xullo ao 3 de agosto abrirase a XXIV Feira Gastronómica de Produtos Galegos.
A partir das 22:30 horas comezará o Montalvo Fest á galega coas orquestras Panorama e París de Noia. A entrada ao festival terá un custo de 3 euros.
O día 1 de agosto continuará a actividade coa actuación de Rockandprol a partir das 23:00 horas. O 2 de agosto haberá obradoiros de artesanía e, ás 22:00 horas, celebrarase o X Serán dos Loureiros coa actuación de Os Gatiños de Portonovo e Lembranzas do Tambre. Haberá queimada gratuíta.
O broche final das festas será o domingo 3 de agosto cunha xornada chea de actividades, na que o X Certame de Pintura Rápida “Arra como Antiga Parroquia” será o evento central. Repartiranse 4.900 euros en premios, así como entradas para o Aquapark Sanxenxo e o Racing Dakart Sanxenxo.
📰 https://bit.ly/FestasArra
