Thea's Ethnographic Guesthouse

27/02/2026

Thea's Ethnographic Guesthouse

16/02/2026

Mit Lasha Jikia – Ich gehöre jetzt zu seinen/ihren Top-Fans! 🎉

15/02/2026

18/01/2026

კალანდა, 14 იანვარი გურიასა და სამეგრელოში ახალი წლის დღესაწაულია, რომელიც მომდინარეობს ლათინური სიტყვიდან და ნიშნავს თვის პირველ დღეს, ხოლო სვანეთსა და ლეჩხუმში _ახალი წლის წინა დღეს.

ჩვენთან, გურიაში მეტ-ნაკლები ინტერპრეტაციით დღემდეა შემონახული კალანდასთან დაკავშირებული რიტუალი და წეს-ჩვეულებები. ფაქტი კი ერთია_ რაც დრო გადის, გურული კალანდის რიტუალის მიმართ ინტერესი იზრდება, განსაკუთრებით ტურისტების მხრიდან, როგორც ტურისტული პროდუქტის.

მინდა მოგილოცოთ კალანდა და ჩემი ოჯახის ტრედიციებზე დაყრდნობით (მეშვიდე თაობამ მოანთო ტაბერნეს 200 წლოვან სამზადისში კერიაზე ცეცხლი), ბავშვობის მოგონებებისა და მონათხრობების მიხედვით მოგიყვეთ ამ დღის რიტუალთან დაკავშირებით:

გურიაში ყველა ოჯახში და ჩვენს ოჯახშიც კალანდის დღესასწაულის მიმართ განსაკუთრებული დამოკიდებულება ჯერ კიდევ შემოდგომიდან იწყებოდა, როცა ოჯახის უფროსი ღვინოს ცაკლე ჭურში ან ჩეთვერში გადაიღებდა, ხეჭეჭურა მსხალს, დემირა ვაშლს, შემჭკნარი ყურძნის მტევნებს ხმელ გვიმრაში ფენა-ფენა შეახვევდა და გოდრით ხულის სხვენზე შემოდებდა...
საკალანდო ღორს და ქათმებს გასასუქებლად ცალკე მოჩიხავდა ყოველ ჭამაზე სუქა-სუქა-ო ეფერებოდა...

კალანდას წინ უსწრებდა ცხემლისჭრა საღამო, როცა ოჯახის უფროსი ტყიდან მაინდამაინც ცხემლის შეშას მოიტანდა და სამზადისში ცეცხლს დააგუზგუზებდა. ამ რიტუალს თავისებური დატვირთვა და დადებითი ენერგეტიკა შემოჰქონდა ოჯახში, რომელშიც თანდათან ერთვებოდნენ არა მარტო ოჯახის წევრები, არამედ სტუმრები, მეზობლები, დიდები, პატარები, იყო თოფის სროლა და ,,აგუნას" გადაძახილი:

აგუნა, აგუნა, გამეიარე,
ბახვი, ასკანა გადმეიარე,
ჩვენს მამულში ყურძენიო,
მტრის მამულში ფურცელიო.
ჩვენს მამულში გოდრითაო,
მტრის მამულში გიდლითაო ...

კალანდის მთავარი ატრიბუტია: ჩიჩილაკი და გასალოცი გობი.

ჯვრით, სუროთი და კურკანტელით შემკობილი ჩიჩილაკი, ნედლი თხილის, წაბლის ან ლეღვის ახალმოჭრილი ტოტებისგან ითლება და სიბოლურად წმინდა ბასილის წვერს ადარებენ. გურიაში მიაჩნდათ, რომ ასე შემკობილი ჩიჩილაკი მუდმივ სიცოცხლის უნარს, მზისკენ სწრაფვას და ნაყოფიერებას უბედებდა ოჯახს.

გასალოც ხის გობზე, რომლის ირგვლივ ანთებულ სანთლებს ამაგრებდნენ, წინასწარ ალაგებდნენ ნახევარმთვარის ფორმის კეცზე გამომცხვარ კვერცხიან ღვეძლებს (გურულ ღვიძელს), მოხარშულ ღორის თავს და საჯიქიოს ნაწილს, მრგვალად მოხარშულ ქათამს, დოქით ღვინოს, დედოხაჭაპურს, ფიალით ღომის ან ხორბლის მარცვლებს ხურდა ფულით და შიგ ჩადებული კვერცხით, შემწვარ შაშვებს, თხილს და ნიგოზს, ხეჭეჭურა მსხალს და ზამთრის ვაშლებს, ჩირებს, ჯანჯუხებს და მორთულ ჩიჩილაკს.

ტრადიციის მიხედვით კალანდა დილა ოჯახში კერიაზე ცეცხლის დანთებით იწყება, ხოლო ოჯახის უფროსი ღმერთის მიმართ მადლიერების ნიშნად და ოჯახის დასალოცად გასალოცი გობით მარნისკენ მიემართება.

კალანდის რიტუალი ფეხადობას ანუ მეკვლეობის ტრადიციასაც გულისხმობს, რომელსაც გურულების რწმენით ოჯახში ხვავი და ბარაქა შემოაქვს. ამიტომ კალანდას ვინც პირველი ჩამოვა ეზოში, მასპინძელმა გასალოცი გობი უნდა დაახვედროს.
ფეხადი ორი იყო კალანდას გურულის ოჯახში, ერთი-ოჯახის უფროსი და მეორე მეკვლე სტუმრებთან ერთად გადაძახილით ,_ ,,ჩვენს ეზოში ყურძენიო, სხვის ეზოში ფურცელიო"...

მეკვლე კარზე სამჯერ დააკაკუნებდა შემდეგი სიტყვებით:,,კარი გამიღე!" სახლიდან სამჯერვე უპასუხებენ:,,რა მოგაქვს?"
მეკვლე ჩამოუთვლიდა,_ ,,მშვიდობა, ღმერთის წყალობა, ხვავი, ბარაქა, სიტკბოება, სიყვარული..."
შემდეგ კარს გაუღებენ და სადღესასწაულო სუფრასთან იწყებოდა მილოცვები.

კესო მახარაძე
,,ტაბერნე გურიაში-აცანას” დამფუძნებელი

ფოტო გადაღებულია გურიაში მეოცე საუკუნის 40-იან წლებში და მასზე ასახულია კალანდის რიტუალი გურულ ოჯახში.
აღებულია საქართველოს ეროვნული მუზეუმის კოლექციიდან.

18/01/2026

For English Scroll Down⬇

📍ოდა სახლების კულტურული მარშრუტის ფარგლებში მნახველებს შესაძლებლობა ეძლევათ, შეაღონ თითოეული ოდის კარი და ძველ ტრადიციებზე აღმოცენებული ტურისტული მომსახურებები აღმოაჩინონ. ეს უნიკალური სერვისები იმდენად მრავალფეროვანია რომ სხვადასხვა თემატურ კლასტერებად დაიყო. ინიციატივა პირველად ქმნის შესაძლებლობას, ვიზიტორმა ერთ მთლიან ქსელში გაიცნოს და პირველ პირში ეზიაროს ოდა სახლების თავგადასავალს, ისტორიას, ყოველდღიურ ყოფას, სოფლის რიტმებსა და ბუნებრივ გარემოს. ოდები დასავლეთ საქართველოს გულში, ნამდვილ პატარა სამყაროებს ქმნიან. აქ მოგზაურს შეუძლია დააგემოვნოს უნიკალური ადგილობრივი სამზარეულო, დააკვირდეს მზადების პროცესს ან თავადაც მოსინჯოს კულინარიული ძალები. აღმოაჩინოს უძველესი ქართული ვაზისა და ღვინის ისტორია, ან გაემგზავროს ბილიკებზე, რომლებიც კულტურულ მემკვიდრეობასთან დააკავშირებს. ოდა სახლებში ღამის გათევაც შესაძლებელია, რათა სტუმარმა ბოლომდე შეიგრძნოს ოდის ხიბლი, საღამოობით კი დანთებულ ბუხართან გაესაუბროს დიასახლისებს, შეიტყოს ქართველი ქალის თავგადასავალი. გამოსცადოს თავი ხელოვნებაში, ჩაებას რეწვის მასტერკლასებში, ან თავით გადაეშვას სათავგადასავლო აქტივობებში.

☘🍇🐝🛏კულტურული კლასტერები საშუალებას გაძლევთ, საკუთარი სურვილით ამოარჩიოთ თქვენთვის საინტერესო თავგადასავლი, შეეხოთ და ეზიაროთ ამ გამოცდილებას. თითოეული ოდა სახლი განუმეორებელ ისტორიას ჰყვება, თითოეული მოჩუქურთმებული კარიბჭის მიღმა ახალი, დაუვიწყარი სამყარო იხსნება, რომელიც გელოდებათ როდის შეაბიჯებთ იქ.

📍Along the Oda House cultural route, every doorway becomes an entrance into a living story. Each carved gate opens to traditions reborn, where centuries of heritage are transformed into unforgettable travel experiences. The richness is so vast that it unfolds into thematic journeys - clusters, inviting visitors to explore different worlds within the same network. For the first time, travelers can experience Oda life as a whole: its adventures and history, its daily rhythms and village spirit, its harmony with nature. Oda Houses are far more than old Georgian dwellings. In the heart of western Georgia, they rise as little worlds of their own. Here, guests are welcomed with flavors of a unique local cuisine, can watch age-old recipes come alive in the kitchen, or try their own hand at cooking. They can follow the story of Georgian vine and wine from its ancient roots, or set out on trails that lead directly into the country’s cultural heritage. As evening comes, the Oda opens its doors to overnight stays, offering the chance to experience its deeper charm, to sit by the glowing fire, to chat with the hostesses and to unfold stories of Georgian women who keep its spirit alive. The journey doesn’t stop there. Guests can explore their creativity through craft workshops, or step boldly into outdoor adventures that awaken the senses.

☘🍇🐝🛏Each cluster opens the freedom to choose your own quest, to touch and experience what speaks to you most. Every Oda holds a voice of its own, and behind each imprinted gateway lies a new, unforgettable world—waiting for you to step inside.

18/01/2026

17/01/2026

16/01/2026