23/03/2026
🥺💔
მთის კაცი იყო პატრიარქი,
იციან მთებმა -
არ ტყდებიან და თავს არ ხრიან მისგან შობილნი...
მთის კაცი იყო პატრიარქი, მთასავით დიდი...
საწუთრო მისგან სიცოცხლეშივ უარყოფილი
გარინდულია... თბილისს აწვიმს...ხალხი დადუმდა,
სნოში მთას ალბათ წუხელისწინ გაუჩნდა ბზარი,
მემახსოვრება საქართველო ნისლისფერი და
მემახსოვრება რომ სიკვდილიც ლამაზი არის...
მშვიდობას ამბობს ყველა კუთხის კილო და კავი,
საქართველოა თავდახრილი, ერთ გზად ერთ ხიდად,
იქნება ამას გულისხმობდა როცა ამბობდა -
არ წავიდოდა ერთიანი რომ არ ეხილა
მისი სამშობლო... რას გაუგებ მთების ნააზრევს,
მკაცრ სიყვარულს და ერთგულებით ნაჭედ ხასიათს...
სიკვდილის კარი მოკვდავებმა ვერგზით ჩავრაზეთ,
თუმცა სიცოცხლეს სიკვდილით ხომ მეტი ფასი აქვს...
მიწა მსუბუქი იყოს გულზე, მიწა ნალოცი,
მიწა მიზეზი ჯვრის სიმძიმის უხმოდ ტარების...
მთის კაცი იყო პატრიარქი, მთასავით დიდი ...
ჯვრის ერთგული და საქართველოს უღალატევი...
✍️ სალომე გიგაური
✏️ Anna Tedeshvili
