24/08/2026
【悼Jojo：佢同太陽仔，都係受害者】
對於近日發生嘅慘劇，我深表惋惜。
作為一個資深嘅行業代表，背後嘅辛酸鮮為人知。不幸嘅事情已經發生，互相指責都冇用！網絡上見到好多淨係識得開口責罵、指指點點嘅批評，同埋所謂嘅「道理」散播仇恨，最令人氣憤！
Jojo本身清楚知道太陽仔嘅經歷，仍然願意出手幫助拯救，一定有佢嘅原因！佢嘅苦心只有一個——「愛」。雖然佢不幸離世，但我相信她內心實在好希望所有流浪、長期被虐待折磨嘅動物，都可以有重新被愛、有一個家嘅機會。呢個係可以肯定嘅。
成件事對Jojo同埋太陽仔嚟講，都係一個悲劇。太陽仔之所以會有嚴重行為問題、變得兇猛，原因只有一個：曾經被人虐待折磨，每日捱飢抵餓，過嘅係非人生活。好多人話係品種基因問題，所以天生有攻擊性會咬人。你認真諗吓：你屋企隻貓同狗，其實全部都係由野獸演變出嚟，基因從來冇改變過。如果真係咁，係咪所有動物都唔適合人飼養呢？
作為一個照顧動物超過10年以上經驗嘅護理員，我照顧過唔同品種嘅大小貓狗。當接觸曾經被嚴重傷害、虐待嘅動物，佢哋嘅防備心同戒心會非常之強。一般人唔會明白佢哋身處地獄嗰段時間所受嘅痛苦！一旦有危險，佢哋會反抗保護自己。所以對住受過傷害嘅動物，只可以用軟攻、慢慢打好關係，令佢哋慢慢放低戒心、建立信任，先至可以入手。經驗得出，任何貓狗都唔鍾意俾人推，就算幾乖都好都會表示不滿。更何況係一隻長期被困、冇自由、被虐待、長期捱餓嘅狗呢？呢一推對佢嚟講威脅性好大，容易衍生好多負面反應。你應該睇過好多新聞，因為上車碰撞、磨擦、爭拗打交而錯手殺人嘅慘劇！相信Jojo估唔到，呢輕輕一次推入籠嘅動作，會有咁大危險。
呢度要提醒所有從業員：今次意外，可能可以避免。如果當日唔係淨係得Jojo一個人，側邊有多個人協助，可能可以將危險減低。接觸體型較大型、或者創傷後遺症帶有攻擊性嘅動物時，起碼搵多一兩個人幫手協助照顧，一旦發生任何突發事情，都有人可以即刻援手，將風險降低。
照顧呢類動物，好大程度上係靠經驗、觀察眼神同行為表現，去判斷當下情況，再用合適方法。特別係中型以上犬，因為佢哋體型有壓倒性嘅優勢，唔容易屈服，更加需要時間同耐性磨合。經常接觸浪浪嘅義工都會明白，要得到一隻有創傷後遺症嘅狗信任，往往需要一段好長時間，因為佢哋經歷過我哋難以想像嘅地獄生活，需要加倍嘅愛心同時間，先可以打開心扉，重新相信曾經深深傷害過佢哋嘅人類。
就算平時得到萬千寵愛嘅毛孩嚟住酒店，都有唔同嘅行為問題需要照顧，例如搗蛋、拆屋、瀨尿、咬人，又或者有病需要特別照顧。好多主人送嚟都會話「自己小朋友好乖好聽話」，因為喺爸爸媽媽眼中，小朋友永遠係最乖嘅。就算1.8kg芝娃娃咁細粒，都唔好小睇佢可以有好強攻擊性，咬到好傷。好多毛孩平時管教唔夠，因為主人太縱太愛，就算犯錯都唔捨得責備，更加唔忍心懲罰。所以並唔係品種問題，而係教育、訓練、經歷嘅問題。
我好相信Jojo接收太陽仔嘅時候，係真心希望可以幫到佢重新有新生活，所以先親力親為去照顧同教導佢，希望可以幫佢幸福尋家。所以希望大家唔好辜負佢嘅犧牲同付出，更加唔好將她嘅付出精神變成仇恨。
一單又一單用動物嚟發洩同虐待嘅個案，社會未有對呢啲真正殘暴嘅行為作出制裁，亦未有立法跟進處罰。呢幾日有人叫「以命抵命」，但與此同時，對長期虐待動物嘅人，卻似乎可以輕輕帶過。呢種落差，值得大家反思。人有機會受教育、有理性，都可以變得咁殘暴，真係人心難測！
再講被虐待嘅動物——由細到大都未得到愛同照顧，每日擘大眼就係遭受折磨、拳打腳踢，連一餐溫飽都冇，日復一日咁被虐待。冇真正出嚟做過救援嘅人，根本唔會明白呢種煉獄。
社會而家怨氣好多，乜都冇做過、淨係喺度噴口水同指指點點嘅人，其實幫唔到任何人。真正有用嘅，係多啲理解、多啲行動，同埋對受過傷嘅生命多一份耐性同謹慎。
希望Jojo嘅付出，可以令更多人明白：愛動物唔單止係一句說話，而係需要承諾、責任、包容，同埋對生命真正嘅尊重。
#太陽仔 #都是受害者 #動物救援 #受虐動物 #流浪動物 #香港動物 #香港毛孩 #寵物酒店 #狗狗行為 #動物福利 #救毛孩 #創傷狗 #給毛孩一個家 #從業員分享 #混種比特鬥牛㹴 Bull Terrier Mix #混種美國惡霸 Bully Mix
