28/02/2026
*'लेखक' झालेला बॅकपॅकर तुमच्या भेटीला - ३ मार्च रोजी*
पोस्ट - नासिक : मराठी भाषा गौरव दिन - २७-२-२०२६
*कुसुमाग्रज स्मरण यात्रा २०२६* या वार्षिक उत्सवामध्ये मी, बॅकपॅकर प्रवीण मानकर, माझ्या प्रवासाचे 'अनवट मानकरायण' सादर करणार आहे. दिनांक ३-३-२०२६, सांयकाळी ६ वाजता. ठिकाण - कुसुमाग्रज स्मारक. बॅकपॅकिंग प्रवासाच्या 'प्रबोधनपर' गोष्टी सांगीन अन बॅकपॅकिंग या 'कला' प्रकारचं 'गद्य-पद्य' मांडीन. बॅकपॅकर्सची वृत्ती-प्रवृत्ती-संस्कृती ,व्यथा तथा पथ्यं वैगरे नक्की काय असतात त्याचं प्रबोधन झाल्यास तुम्हांलाही बॅकपॅकिंगची स्वप्ने पडोत अशी अपेक्षा. सध्या मी तुमची स्वप्ने जगतोय हे नक्की.
संपूर्ण भारत स्कुटरवर भ्रमण करतांना आणि ७५ देशांची भटकंती करतांना मी माझ्या 'टेक्स्ट, ऑडिओ व व्हिडीओ' ब्लॉग्सच्या माध्यमातून तुम्हांला माझ्या अनवट छंदाबद्दल अवगत करीत होतो. बहुसंख्य ज्ञात आणि अज्ञात वाचकांच्या अनुग्रहाला मी पात्र झालो. माझ्या वाचकांनी मला आग्रह केला की 'मानकर पुस्तक छापा अन लेखक व्हा'. या आग्रहाला मी पाच वर्षांनी बळी पडलो अन एक पुस्तक छापलचं. 'पुनश्च पूर्व आफ्रिका' या पुस्तकात मी २५ वर्षांनी ( तेंव्हा १९९९ आणि आज २०२४) स्मरणरंजनासाठी गेलो होतो त्याच्या नोंदी आहेत. यातून मी कसा घडलो हे आत्मनिवेदन तर आहेच पण आफ्रिकेची चांगली झलक सुद्धा आहे.
हे पुस्तक माझं पहिलं अपत्य. मराठी भाषा दिनाचं औचित्य साधून मी ते जन्मास घातलं अन पुस्तकाचं नशीब 'यशस्वी' होईल अशी व्यवस्था केली. साहित्य निर्मिती झाली (थोडं हसा). एका महानुभावाने मला सांगितलं 'मानकर पुस्तक छापल्यावर लेखकाचा जन्म होतो'. ( थोड्या टाळ्या ). असो. मी आता वेदनामुक्त आहे.
*हे पुस्तक तरुणांसाठी खूप प्रेरणादायी आहे याबद्दल माझ्या मनात यत्किंचित शंका नाही. इतरांसाठी पुस्तक मनोरंजक सुद्धा आहे. पुस्तकाच्या प्रती कार्यक्रमात उपलब्ध असतील. किंमत रुपये २००, पाने २००. मी ३०० प्रती छापल्या आहे - १५० प्रती महाराष्ट्रातील सार्वजनिक वाचनालयांना मोफत पाठवणार आहे. वाचाल तर वाचाल असं आपण नेहमी म्हणतो ना म्हणून. पुस्तक विकत घेऊन तूम्हीही माझ्या समाजप्रबोधनात भाग घेऊ शकता*.
भेटू. नक्की भेटू. कुसुमाग्रज स्मारक येथे. मंगळवारी - ३ मार्च २०२६ या दिवशी. त्या दिवसानंतर तुम्हांलाही स्वप्ने पडू लागली तर मला ढीगभर आनंद होईल.
*बॅकपॅकर - प्रवीण मानकर, उल्का मानकर सह*.
