09/01/2021
ទុក្ខលំបាករបស់មនុស្សស្រី
ថ្ងៃនេះ Emmeline សូមចែករំលែកនូវទុក្ខវេទនាទាំង ៥ ដែលមនុស្សស្រីរូបណាក៏ត្រូវឆ្លងកាត់ ហើយមនុស្សប្រុសចំនួនមិនអាចយល់ បើទោះបីជាពិភពលោកកំពុងឆ្ពោះទៅរកភាពស្មើភាពនៃយេនឌ័រក៏ដោយ តែមនុស្សស្រីនៅតែចៀសមិនផុតពីទុក្ខសោកខាងក្រោមនេះ។
១. ជំងឺប្រចាំកាយរបស់មនុស្សស្រី ឬវដ្ដរដូវ ស្ត្រីតែងមានសេចក្ដីទុក្ខទាំងខាងផ្លូវកាយ និងផ្លូវចិត្ត នៅពេលដល់ចុងខែជាពេលដែលនាងមានឈាមរដូវ។ ក្នុងរដូវកាលនេះ នឹងធ្វើឲ្យឈឺចុកចាប់ដល់ពោះ ឬឈឺក្បាល ឬទៅជាអាការផ្សេងៗ បើជួនជាឈាមរដូវដើរមិនទៀងផង ឬមានធ្លាក់សផងនោះ ក៏នឹងរឹតតែជាបញ្ហា។ មនុស្សប្រុសត្រូវយល់និងជួយរួមចំណែកនូវសេចក្តីទុក្ខនេះផង និងមិនធ្វើអ្វីដែលជាការលំបាកដល់នាងឡើយ ។
២. ទុក្ខនៃការមានគភ៌
នាងតែងមានសេចក្ដីទុក្ខ នៅពេលដែលនាងមានគភ៌ ទាំងអៀនខ្មាស ទាំងត្រូវទ្រាំថែមទៀតនូវទម្ងន់កូនក្នុងផ្ទៃជារៀងរាល់ថ្ងៃ។ នាងមិនអាចឈរបានស្រួល ដើរបានស្រួល ឬប្រកបកិច្ចការបានស្រួល ដូចកាលដែលមិនមានកូននោះទេ។ ទាំងចំណីអាហារក៏ដូចគ្នាដែរ មានស្រីខ្លះរហូតដល់ចាញ់កូន ឬនឹកចង់ចំណីផ្ដេសផ្ដាសដែលរកមិនបានក៏មាន ពិបាកណាស់។
៣. ប្រថុយជីវិតឆ្លងទន្លេ
ហេតុអ្វីសម្រាលកូន ត្រូវបានចាស់ៗហៅថាឆ្លងទន្លេ? ព្រោះការកើតកូននេះនៅជំនាន់មុន មានភាពគ្រោះថ្នាក់ខ្លាំង មិនដឹងថាឆ្លងផុតឬអត់ឡើយ។ ទោះបីជាវិទ្យាសាស្ត្រមានភាពរីកចម្រើនច្រើនហើយក៏ដោយ ប៉ុន្តែការសម្រាលកូននៅតែមានហានិភ័យខ្ពស់។ ហេតុដូចនេះហើយ នារីស្ទើរតែគ្រប់រូបត្រូវប្រថុយជីវិតខ្លួនឯងរាល់ពេលពពោះកូនម្ដងៗ។
៤. មិនស្មើភាពនឹងមនុស្សប្រុស
ទោះបីជាសង្គមកំពុងតម្រង់ទៅកាន់ភាពស្មើភាពនៃយេនឌ័រ ដោយមានការលើកកម្ពស់នារីនៅស្ទើរគ្រប់មជ្ឈដ្ឋាន ដោយគេសង្កេតឃើញថា មនុស្សស្រីនៅពេលនេះ ក៏មានការងារធំមិនចាញ់មនុស្សប្រុសដែរ។ យ៉ាងណាក្ដី គំនិតមនុស្សស្រីបង្វិលចង្ក្រានមិនជុំនៅតែកើតឡើងមិនលោះ។ មិនថាក្នុងសង្គម ឬក្នុងគ្រួសារកូនស្រីតែងតែមានអាទិភាពទាបជាងកូនប្រុសរហូត ដោយគេតែងគិតថាមនុស្សស្រីមិនសូវមានប្រយោជន៍។
៥. មនុស្សស្រីឆាប់អស់តម្លៃជាងមនុស្សប្រុស
នៅលើបណ្ដាញសង្គម តែងបង្ហោះពីតម្លៃទឹកដោះរបស់មនុស្សស្រី ដែលត្រូវនឹងអាយុរបស់នាងជានិច្ច។ ដោយជាធម្មតាគេឃើញថា មនុស្សស្រីកាន់តែក្មេង ទទួលបានថ្លៃបង្គាប់កាន់តែខ្ពស់ តែបើអាយុរាងជ្រេបន្តិច នឹងធ្លាក់តម្លៃភ្លាម។ ខណៈមនុស្សប្រុសអាយុច្រើន គេគិតថាចាស់ទុំ រឹងប៉ឹងនោះ មនុស្សស្រីបើអាយុច្រើន នឹងត្រូវគេឡកលើយថាចាស់ហើយ តែអត់គូជាដើម៕
នាំមកជូនដោយ៖ Emmeline ( )
