02/10/2026
හෝර්ටන් තැන්නේ, තැන්න හරහා ගලා යන බෙලිහුල්ඔය දිගේ ඇති සෑම තටාකයකටම වගේම තමන්ටම ආවේණික වූ කතාවක් තිබෙනවා. පැරණි ට්‍රවුට් මසුන් ඇල්ලීමේ සිතියම්වල පවා මෙම තටාක ඉතා සූක්ෂ්ම ලෙස සලකුණු කර තිබුණා.
ඒ අතරින් එක් තටාකයක් වටා තිබෙන්නේ තරමක් අඳුරු සහ බියජනක පුරාවෘත්තයක්.
1946 වසරේ පළ වූ ‘Loris’ සඟරාවේ (Vol. 4, No. 2) G. Anderson විසින් ලියන ලද ‘Horton Plains’ නම් ලිපියේ, හෝර්ටන් තැන්න පිළිබඳ පැරණි ජනප්‍රවාදයක් සඳහන් කරනවා.
Anderson පවසන්නේ, එකල හෝර්ටන් තැන්න හරහා ශ්‍රී පාදයට යාමට තිබූ මාර්ගයක් භාවිත කළ “සියයකට හෝ ඊට වැඩි වන්දනාකරුවන් පිරිසක්” කොල්ලකරුවන් විසින් මඟ රැක පහර දී ඝාතනය කළ බවට ජනප්‍රවාදයක් තිබූ බවයි.
පසුව එම පිරිස ඝාතනය කළ බවට සැලකෙන ස්ථානයේ තිබී ඔවුන්ගේ හිස් කබල් සොයාගත් බවත් Anderson සඳහන් කරනවා.
එම ස්ථානය ආසන්නයේ හතරැස් හැඩයක පස් ගොඩක් ද තිබූ බව ඔහු පවසනවා. එම ස්ථානය කැණීම් කර බැලුවත් කිසිදු විශේෂ සාක්ෂියක් හමු වී නැහැ.
නමුත් Andersonගේ සටහනේ ඉතා වැදගත් තොරතුරක් තිබෙනවා.
ඔහු සඳහන් කරන ආකාරයට, මෙම හිස් කබල් සොයාගෙන තිබුණේ ලිපිය ලියන අවස්ථාවට වසර 70කට පමණ පෙර.
ඒ අනුව 1946 සිට වසර 70ක් පමණ ආපස්සට ගියහොත්, මෙම හිස් කබල් සොයාගෙන තිබිය හැක්කේ 1876 පමණ කාලයේදී බව අනුමාන කළ හැකියි.
ඉතින්… ඒ ස්ථානය කොහෙද?
Anderson තවත් වැදගත් තොරතුරක් ලබා දෙනවා.
ඔහු කියන්නේ මෙම ඝාතනය සිදු වූ බවට සැලකෙන හෝර්ටන් තැන්නේ කොටස “Golgotha” ලෙස වසර 60කට වැඩි කාලයක් තිස්සේ හැඳින්වූ බවත්, එය පැරණි සිතියම්වල පවා එම නමින් සලකුණු කර තිබූ බවත්ය.
නමුත් අද භාවිත වන හෝර්ටන් තැන්නේ සිතියම්වල එවැනි ස්ථානයක් දකින්නට නැහැ.
මෙම ජනප්‍රවාදය පසුව Anslem de Silva විසින් 2007 වසරේ පළ කළ Diversity of Horton Plains NP කෘතියේද Andersonගේ ලිපිය උපුටා දක්වමින් සඳහන් කර තිබෙනවා.
තවත් සිත්ගන්නාසුලු සාක්ෂියක් හමුවෙන්නේ 1956 වසරේදීයි.
එවකට ශ්‍රී ලංකාවේ (එවකට Ceylon) ඇමරිකානු තානාපතිවරයා වූ Philip Crowe, හෝර්ටන් තැන්නට මසුන් ඇල්ලීම සඳහා ගිය අවස්ථාවක් ගැන තම කෘතිය වන Diversions of a Diplomat in Ceylon හි සඳහන් කරනවා.
ඔහු එහි “Golgotha Pool” නමින් හැඳින්වූ තටාකයක් ගැන සඳහන් කරන අතර, ශ්‍රී පාදයට යමින් සිටි වන්දනාකරුවන් පිරිසක් එම ස්ථානයේදී ඝාතනය කළ බවට තිබූ ජනප්‍රවාදයද සඳහන් කරනවා.
Crowe පවසන්නේ, වසර ගණනාවකට පසුව එම ස්ථානයේ ගැඹුරු ජලයේ සිට ඔවුන්ගේ හිස් කබල් “සිනාසෙනවාක් මෙන්” පෙනී තිබූ බවට කතාවක් පැවති බවයි.
නමුත් Croweද එම ස්ථානයේ නිශ්චිත පිහිටීමක් ලබා දෙන්නේ නැහැ.
කෙසේ වෙතත්, පැරණි සර්වේ සිතියම් සහ ට්‍රවුට් මසුන් ඇල්ලීමේ සිතියම් සවිස්තරාත්මකව අධ්‍යයනය කිරීමෙන් පසුව, අපට අවසානයේ එම ස්ථානය හඳුනාගැනීමට හැකි වී තිබෙනවා.
වඩාත්ම පුදුම සහගත කරුණ වන්නේ — එම ස්ථානය සැබවින්ම අදත් තිබීමයි.
පැරණි සිතියම්වල සලකුණු කර තිබූ හෝර්ටන් තැන්නේ තවත් අභිරහස් ස්ථාන සහ ඒවාට සම්බන්ධ ඉතිහාසය පිළිබඳව ඉදිරියේදී වැඩි විස්තර හෙළි කිරීමට අපි බලාපොරොත්තු වෙනවා.
🎥 “Horton Plains – Highland Secrets” වාර්තා චිත්‍රපටය සහ 📖 කෘතිය තුළින්, පැරණි සර්වේ සිතියම්වල සලකුණු කර ඇති මෙම අභිරහස් ස්ථාන පිළිබඳව තවත් තොරතුරු සොයා බලමු.
අවුරුදු 150කට ආසන්න කාලයක් පැරණි මේ අභිරහස… ඇත්තටම සිදු වූයේ කොහේද?
ඉදිරියේදී බලාපොරොත්තු වන්න…
මූලාශ්‍ර:
• G. Anderson – “Horton Plains”, ‘Loris’, 1946, Vol. 4, No. 2
• Philip Crowe – “Diversions of a Diplomat in Ceylon”, 1956
