Daisy's Garden Hospitality

31/10/2024

31/01/2019

මං ගිහින් එන්නම්....

එහෙම කියලා ගියේ එයා
ඒත් ආයෙ නොඑන ගමනක්
යන්නම ගිහින් අපිටත් කලින්....

මෙවන් ඉතා දුක්බර වදන් අපි නිතරම අසමු. ඒ හදිසියේ අපගේ සමීපතමයන් අපෙන් සමුගත් විටකය. නැතිනම් මියගිය විටකය.

ඔවුන් අපට අවසන් වරට කියූ දේ....කල දේ අප සිහිපත් කරමු. ඇතැම් විට අපේ මුළු ජිවිත කාලයටම ඒ මතකය..ඒ වචන මතක තියෙනු ඇත.

මල ගෙදරකට ගිය විට අප සියල්ලන්ම මිය ගිය තැනැත්තා ගැන දුක් වෙමු .මිය ගිය හේතු ගැන කතා කරමු . අසනිපයකින් මිය ගිය අයකු නම් ඒ රෝගය ගැන කතා කරමු. හදිසි අනතුරක් නම් එය වලකාගන්නට තිබුනා නොවේදැයි කතා වෙමු.

එහෙත් අපි කිසිවිට අපි ගැන සිතුවාද...?

මියගිය තැනැත්තා ⁣ගේ දේහය දෙස බලා ඒ පුද්ගලයා සිහිපත් කරනවා ඇරෙන්නට ඔබටද මටද එලෙසම යම් දිනක මිය යන්නට වන බව අප මොහොතකට වත් සිතුවෙමුද..?

නැත....!

නැත....!

එවන් සිතිවිල්ලක් ආවද ඉක්මනින්ම අප එම හිතිවිල්ල පලවා හරිමු.
වයෝවෘද්ධ අයකුගේ මලගමක් නම් " අපෝ මට තව කල් තියෙනවා " යැයි සිතමු. රෝගයකින් මල අයකු නම් " මට දැනට කිසි ලෙඩක් නෑ.ප්‍රෙෂර් නෑ.සීනි නෑ. කොලෙස්ටරෝල් නෑ." කියා සිතා අප අපවම සනසා ගනිමු .
හදිසි අනතුරක් නම් " මම කවදත් පරිස්සමෙන් යන්නේ " යැයි හිත අස්වසමු. අකල් මරනයක් නම් " කෙන්දරේ නම් කියනවා අවුරුදු 80 ඉන්නවා කියලා. මට මොකුත් වෙන් නෑ එහෙම " .
ඔය වැනි තර්ක දමා " මමද දිනක මෙලෙසම මිය යනවා "යන හිතිවිල්ල අකර්මණ්‍ය කර පලවා හරිමු.

එහෙත් ඔබටද මටද කිසිදු විටක මරණයෙන් ගැලවිය නොහැක. එය මේ සටහන ලියන මට තව සුළු මොහොතකින් වුව විය හැක. මෙය කියවන ඔබටද තව තත්පරයකින් මරනය හමුවිය හැක . එතරම්ම අපගේ ජිවිත අවිනිශ්චිතය. මරණය නියතය.

කවි ලියන මම උන් හිටි ගමන් මරණය ගැන ලියනවාට ඔබ දැන් විමතියටත් බියටත් පත්ව නොවේද මේ සටහන කියවන්නේ....?

අප මෙතරම් කතා කරනවාටත් අකමැති මරණයම අපට අපේ ජිවිත සාර්ථක කරගතහැකි අපූරු" මිතුරකු "කරගත හැකිය යන්න කියන්නට මට අවැසිය.

අන් සියළු මිතුරන්ටද වඩා " මරනය " හොද මිතුරෙකි.කිසිදා අප හැර නොයන මිතුරෙකි. අපව යහපත් මිනිසුන් කරන්නට මේ මිතුරා තරම් තවත් අයකු නම් මම නොදනිමි.

ඒ කොහොමද මරනය මිතුරෙක් වෙන්නේ ....??

මම එය ඔබට කියමි. මම මරනය හොදම මිතුරා කරගත් අයුරු කියමි.

_____________________________________

සෑමදිනනකම අළුයම අවදිවූ විගස මම මගේ දකුණු අත ගෙන වම් පපුව මත තබමි. එවිට හුස්මක් සමග මගේ පපුව උස් පහත් වනු මට දැනේ. තවත් උවමනාවෙන් සිටිවිට අත්ලට හදවත ගැහෙන අයුරුද දැනේ.

එවිට මම මෙසේ සිතමි.

" මගේ හුස්ම වැටෙනවා. හදවත අපූරුවට ගැහෙනවා. මම තවමත් ජිවත් වෙනවා. තව දවසක් මට ලැබිලා.

මරණය මගේ මිතුර අද මට තව එක දවසක් ඉන්න දීලා . ස්තූතියි ඔබට.
අද මට ලැබුන මේ එකම දවස මම අද හොදම මිනිහෙක් වෙන්න උපරිම උත්සාහ කරනවා ."

" මගේ බිරිද දරුවන් එක්ක අද සතුටින් ගත කරනවා . එයාල⁣ට දැනෙන්න ආදරේ කරනවා . මගේ අම්මට අද කතා කරනවා . ආයෙ කතා කරන්න බැරි වෙයි . "

" මිනිස්සු එකට හොදට හිනාවෙලා කතා කරනවා. ඉස්පිරිතාලෙ ⁣ලෙඩ්ඩු එක්ක කාර්ය මණ්ඩලය එක්ක හොදින් කතා කරනවා. පුළුවන් විදියට හැමෝටම උදව් කරනවා .හොද වචන කතා කරනවා. මොකද අද මම කියන වචන කරන දේවල් අන්තිම වචන වෙන්න පුළුවන් "

" මට අතපසුවුන වැඩ පුළුවන් තරම් අදම කරනවා. හෙටක් එන එකක් නැතිවෙයි.

අද මට ලැබුන මේ එක දවසතුල මම හොද මිනිහෙක් වෙන්න උත්සාහ කරනවා. "
______________________________________

ඔබත් මේ දේ කර බලන්න. උදෑසන අවදිවූ විගස පලමු හිතිවිල්ල,රාජකාරිය " මරණය "නම් මිතුරා ඔබට දුන් දවස හොදින් ගෙවන හැටි හිතට ගන්න.

එවිට ටික දිනකින් ඔබටම දැනේවි ඔබ ටිකින් ටික වෙනස් වන බව . ඔබ තුල ඇති නපුරු හිතිවිලි ඔබෙන් ඉවත් වන බව දැනේවි.

මරණය හොදම මිතුරකු වූ පසු ඔහු නිරතම ඔබට කතා කරාවි. වචනයක් හෝ තරහින් කී විගස ඔහු ඔබට මතක් කරාවි...
"අමතක වුනාද අද දවස විතරයි දුන්නෙ ඔබට මිත්‍රයා...! "

එසේ ඔබ යහපත් මිනිසකු වනවිට මරණය ද ඔබට වැඩිපුර" බෝනස් දින " ලබා දෙනු අැත. ලෙඩ රෝග
, හදිසි මාරක තරමක් හෝ ඔබට කරදර නොකරනු ඇත. මන්ද ඔබ මේ වඩන්නේ සම්මා වායාමයකි..සම්මා සතියකි. දෙවියන්ගේ ඇල්ම බැල්මද ඔබට ලැබෙනු ඇත.

ඔබත් මේ ව්‍යායාමය කරන්නට උත්සාහ කරන්න. මරණය මිතුරකු කරගන්න. එවිට සැබැවින්ම මරණය හමුවන දිනක ඔබ පසුතැවිලි නොවනු ඇත.
" අනේ මට තව දවසක් ජිවත් වෙන්න ඕනෙ . මගෙ ලමයි දරුවො එක්ක ආදරෙන් ඉන්න. මගෙ වැරදි හදාගන්න . මට සමාව ඉල්ලන්න...."

ඉස්පිරිතාල වල අප නිතරම දකින එවන් ජිවිතය යදින ඉල්ලිම් කරන්නට එවිට ඔබට අවැසි නොවනු ඇත . මන්ද ඔබ සෑම දිනක්ම ජිවිතේ අවසන් දිනය ලෙස උපරිම හොදින් ගත කල හෙයිනි.....!

වෛද්‍ය රසික සඳරුවන් කුලතිලක

16/10/2017

01/11/2016

01/11/2016

Plants are available for sale