21/10/2022
බෙයිජිං ගුවන් තොටුපළෙහි දෙවන පර්යන්තයෙන් ගුවනට නැගි ශ්රී ලාංකන් ගුවන් යානය සිය අතරමැදි නැවතුම වූ මැලේසියාවේ ක්වාලාලම්පූර් ගුවන් තොටට ගොඩ බැස්සේය.
කිරිල්ලියක මෙන් කිචි බිචි ගාමින් , යාබද අසුනෙහි පැමිණි චීනයේ අධ්යාපනය ලබන මැලේසියානු ජාතික විශ්ව විද්යාල ශිෂ්යාව , කෙදිනක හෝ ලංකාවට පැමිණෙන බව ද පවසා ගුවන් යානයෙන් බැස ගත්තාය.
තරමක් දීර්ඝ ගුවන් ගමනේ ඒකාකාරී බව හේතුවෙන් මා අසුනේ ආනතිය තරමක් වෙනස් කර, ඇය ගේ කිචිබිචිය නිසා මා අසුන ඉදිරියේ වූ කුඩා දර්ශන තිරය මත තාවකාලිකව නතර කර තිබූ " The Pianist " චිත්රපටය නැවත නැරඹීමට පටන් ගතිමි.
මඳ වේලාවකින් මගේ අළුත් ගමන් සගයා පැමිණියේය . මා දෙස බලා මද සිනහවක් නගා අසුනෙහි වාඩිවූ හෙතෙම ,
Hey misterr , Arrre you frrom India ?
You seems to be frrom kerral ,
යනුවෙන් පැවසීය .
උච්චාරණය අනුවම හෙතෙම ඉන්දියානුවකු බවට මා එලඹි නිගමනය සත්ය වූ අතර, පසුව තොරතුරු කතාබහ කිරීමේදී ඔහු පැවසූ පරිදි මලයාසියාවේ හා අප්රිකානු රටවලද විහිදි ඔහුගේ ව්යාපාරය , තක්කාලි ආශ්රිත නිශ්පාදන සකසා යුරෝපයට යැවීම පදනම් කර ගත්තක් විය.
දශක දෙකකට පමණ පෙර දකුණු කොරියාවේ ඉංජිනේරුවෙකු ලෙස සේවය කර තිබූ ඔහු, මා ලාංකිකයෙකු බව දැනගත් පසු හෙළිකලේ අපූරු පුවතකි.
ඔහු කොරියාවට ගිය මුල් අවදියේ සේවය කල ආයතනය මහා පරිමාණයේ කූඩාරම් රෙදි නිශ්පාදන ආයතනයක් විය.එහි ඇතැම් යන්ත්ර එක්දහස් නවසිය හැත්තෑව දශකයේ නිමවූ ඒවා විය.
දිනක් රෙදි නිශ්පාදණය හා අදාල විශාල යන්ත්රයක් , යාන්ත්රික දෝෂයක් මත නතර විය. එහි තිබූ එක් විශාල එලවුම් රෝදයක් හා සම්බන්ධ බෙයාරිමක ගැටළුව ඇති බව හඳුනා ගැණින . මීටරයකට ආසන්න විශ්කම්භයක් සහිත එම විශාල වානේ රෝදය, මැද කුඩා සිදුරු සහිතව නිමවා තිබූ අතර, එය භ්රමණය වන විට ඝර්ෂණය හා රත්වීම අවම කිරීමට ඒ හරහා ඊට සපයා තිබූ ලිහිසි තෙල් වෑහෙන සේ එය නිමවා තිබූ බව හෙතෙම පැවසීය .
ඒ වනවිට දශක තුනක් පමණ අඛණ්ඩව ක්රියාත්මකව තිබූ එම රෝදය සැබවින්ම ඉන්ජිනේරු ශිල්පයේ අපූරු නිර්මාණයක් බවට ඔවුන් අතර කතාබහට ලක්ව තිබුණි.
අතීතයේ සිට කොරියාවේ පැවති දියුණු තාක්ෂණය පිළිබඳව එය හොඳ උදාහරණයක් බව බොහෝ කොරියානුවන් ගේ මතය වූවද , එය පිරිසිදු කරන විට , එහි කේන්ද්රයේ අක්ෂ දණ්ඩ වටා කොටා තිබූ දෙමළ අක්ෂර වලට තරමක් සමාන අක්ෂර මතුවන්නට විය.
එය ඉන්දීය තෙළිඟු අක්ෂර වලට හුරු එම අක්ෂර අනුව එය ඉන්දීය නිර්මාණයක් බව ඔහු සාඩම්බරයෙන් අවසන විට, එවකට එම ආයතනයේ සේවයේ යෙදුන එකම ශ්රී ලාංකීය ෆෝමන් වරයා ඒවා සිංහල අක්ෂර බවත්, එය ලංකාවේ නිපදවන ලද්දක් බවත් පවසා තිබුණි.
බොහෝ අය අවඥාවෙන් ඔහුට සිනා සෙද්දී සිය මුදල් පසුම්බියෙන් ශ්රී ලංකාවේ කාසියක් ගත් ඔහු, එහි එක් පසක තිබූ රාජ්ය ලාංචනයේ සිංහයා ඇතුළු කොටස්, එම රෝදයේ තිබූ ලාංචනයට ඇති සමානත්වය පෙන්වා තිබූ අතර, එසේනම් එහි සටහන් කර තිබූ අකුරු හා වැකිය ලියා පෙන්වන ලෙස සෙස්සන් ඔහුට අභියෝග කර තිබුණි.
අනතුරුව ඔහු එය ඒ අයුරින්ම ලියා පෙන්වූ පසු, එය ලාංකීය නිශ්පාදනයක් බව අන්අය පිළිගත් අතර , ඉන්දීය ජාතික ගමන් සගයා පැවසූ අයුරින් එය ලංලෝ - ඔරුවල වානේ කර්මාන්ත ශාලාවේ එවකට නිශ්පාදණය කරන්නට ඇති බව මා උපකල්පනය කලෙමි.
එවන් අතීතයක් තිබූ ශ්රී ලංකාව, වර්තමානයේ පත්ව ඇති තත්වය අතිශය ශෝක ජනකය.
එදා දකුණු කොරියාවට කම්හල් සඳහා නිමි ලෝහ උපකරණ සැපයූ අප, අද එහි විවිධ කර්මාන්තශාලාවල ශ්රමය සඳහා ලාංකීය කම්කරුවන් සපයන රටක් බවට පත්ව සිටිමු.
