01/12/2020
Органски методи за отстранување на крлежот.
Почитувани пчелари,
Денес, крлежот претставува еден од основните предизвици во пчеларството за чија контрола во пчелните семејства пчеларите одвојуваат значителни средства и време. За жал, употребата на синтетичките хемиски средства за многу пчелари сѐ уште останува основна или единствена опција, а помал е бројот на пчелари кои се одлучуваат за употреба само на органските киселини или биотехничките методи за контрола на крлежот. Со новиот прирачник „Алтернативни методи за контрола на Varroa destructor во пчелните семејства“ (Узунов и Бихлер, 2020) на пчеларите им се нуди нова можност и визија за начинот на контрола на крлежот и добивањето на безбедни пчелни производи.
Го замоливме проф. д-р Сретен Андонов, како еден од соработниците на авторите, да даде свој осврт во однос на овој нов прирачник:
Осврт по повод публикувањето на прирачникот „Алтернативни методи за контрола на Varroa destructor во пчелните семејства“
Со публикување на новиот прирачник за пчеларство „Алтернативни методи за контрола на Varroa destructor во пчелните семејства“, авторите проф. д-р Александар Узунов и д-р Ралф Бихлер на едноставен начин „чекор по чекор“ доближуваат три биотехнички методи (Отстранување на легло, Матица во кафез и Рамка изолатор), за контрола на крлежот Varroa destructor, кој претставува најголемата закана за пчеларството во Светот. Прирачникот е резултат на повеќегодишното практичното искуство на авторите во примената и истражувањето на методите во Европа, а посебно во Македонија и Германија. Тука, авторите даваат препораки за правилна и навремена примена на методите, а воедно ги посочуваат и критичните точки и аспекти во примената на овие методи кои во голем степен сега се подобрени и прилагодени на различните услови и начини на пчеларење.
Публикувањето на прирачникот коинцидира и со објавувањето на најновиот научен труд на авторите, заедно со група истражувачи од повеќе региони во Европа, посветен на споменатите методи (Büchler et al., 2020 - Summer brood interruption as integrated management strategy for effective Varroa control in Europe). Со тоа, прирачникот придонесува за достапност на светските новитети и трендови во контролата на крлежот Varroa destructor, и полесна негова имплементација во секојдневието на пчеларите. Треба да се истакне современиот пристап на достапни информации за пчеларската литература, по во прирачникот методите се прикажани и преку видео записи т.е. употребата на QR кодови кои лесно се прегледуваат преку мобилните телефонски уреди.
Колку што јас сум информиран, во Македонија овој прирачник е прв материјал за оваа проблематика, кој преставува одличен материјал за пчеларите преку кој авторите Узунов и Бихлер праќаат јасна порака за промена на начинот на размислување и пчеларење во правец на употреба на средства и методи со кои ќе се гарантира безбедноста на потрошувачите на пчелни производи, пчеларите, а воедно и заштитата на животната средина.
Проф. д-р Сретен Андонов
Факултет за земјоделски науки и храна - Скопје
Прирачникот „Алтернативни методи за контрола на Varroa destructor во пчелните семејства“ е дел од пакетот литература (заедно со Пчеларскиот календар и Прирачникот за производство на матици и матичен млеч) што MacBee го вети на сите регистрирани учесници на советувањето „Пчеларски ден – знаење и дружење 2020“ организирано на Факултетот за земјоделски науки и храна од Скопје.
Затоа, денес, кога прирачникот е објавен, ќе Ви биде доставен со што MacBee го исполнува ветувањето до своите редовни поддржувачи и учесници на советувањата.
Прирачникот е подготвен со финансиска поддршка на Швајцарската агенција за развој и соработка (Програма за зачувување на природата), а отпечатен е во ограничен број од 300 примероци. MacBee ја презеде обврската само за дистрибуција на копиите поврзани со учеството на споменатото советување.
Со почит,
Дипл. зем. инж. Горан Алексовски,
Претседател на MacBee
