22/04/2020
မန္တလေးတိုင်းဒေသကြီးပြင်ပ ရောဂါပိုးတွေ့ရှိမှုများသည့်ဒေသတွင် သွားရောက်နေထိုင်ခဲ့ပြီး ပြန်လည်ရောက်ရှိသူဖြစ်ပါက Facility Quarantine (၂၁)ရက်နှင့် Home Quarantine (၇)ရက် ဆောင်ရွက်ရမည်
မန္တလေးတိုင်းဒေသကြီးအပါအဝင် အခြားသော တိုင်းဒေသကြီးနှင့် ပြည်နယ်များတွင် COVID-19 ရောဂါပိုး တွေ့ရှိသူ ၁၂၁ ဦး ရှိပြီဖြစ်ရာ ထပ်မံ၍ ရောဂါကူးစက်မှု မဖြစ်ပွါးစေရေးအတွက် မန္တလေးတိုင်းဒေသကြီးပြင်ပ ရောဂါပိုးတွေ့ရှိမှုများသည့်ဒေသတွင် သွားရောက်နေထိုင်ခဲ့ပြီး ပြန်လည်ရောက်ရှိသူဖြစ်ပါက Facility Quarantine (၂၁)ရက်နှင့် Home Quarantine (၇)ရက် ဆောင်ရွက်ရန် မန္တလေးတိုင်းဒေသကြီး COVID-19 ထိန်းချုပ်ရေးနှင့် အရေးပေါ်တုံ့ပြန်ရေးကော်မတီက ဧပြီ ၂၁ ရက်တွင် ညွှန်ကြားစာထုတ်ထားကြောင်း သတင်းရရှိသည်။
အဆိုပါ ညွှန်ကြားစာတွင် ရောဂါပိုးတွေ့ရှိခြင်း မရှိသည့်ဒေသတွင် သွားရောက်နေထိုင်ခဲ့ပြီး ပြန်လာသူဖြစ်ပါက တာဝန်ရှိသူများ၏ စစ်ဆေးမှုခံယူပြီး လိုအပ်မှသာ Facility Quarantine (၂၁)ရက်နှင့် Home Quarantine (၇)ရက် ဆောင်ရွက်ရန်၊ မိသားစုလိုက် ပြန်လည်ရောက်ရှိလာသူဖြစ်ပါက နေအိမ်အလွတ် (သို့မဟုတ်) သီးသန့်နေရာတစ်ခုခုတွင် မိသားစုလိုက် Quarantine ပြုလုပ်လိုပါက သတ်မှတ်ရက်အတိုင်း ပြုလုပ်ခွင့်ပြုရန်၊ Hotel Quarantine ပြုလုပ်လိုပါက ခွင့်ပြုပေးရန်နှင့် မိသားစုလိုက်မဟုတ်ဘဲ တစ်ဦးချင်း ပြန်လာခြင်းဖြစ်ပါက သတ်မှတ်နေရာတွင် Facility Quarantine ခံယူရန် ထပ်မံဖော်ပြထားသည်။
မန္တလေးတိုင်းဒေသကြီးအတွင်း ကုန်စည်စီးဆင်းမှုအတွက် ဝင်/ထွက်သွားလာနေသည့် ကုန်တင်ယာဉ်များနှင့် သာမန်အိမ်စီးကားများမှအပ ကျန်ရှိသော ခရီးသည်ပို့ဆောင်ရေး ယာဉ်လိုင်းများအားလုံး၊ ဘုရားဖူးယာဉ် များအားလုံး၊ အပန်းဖြေခရီးသွားယာဉ်များအားလုံး၊ အလည်အပတ်သွားရောက်သည့် ယာဉ်များအားလုံးနှင့် အိမ်စီးကားများအနက် (ယာဉ်မောင်းများအပါအဝင် (၄) ဦးထက်ပိုသော) မော်တော်ယာဉ်များအားလုံး မန္တလေးတိုင်းဒေသကြီးအတွင်းသို့ ဝင်/ထွက် သွားလာခွင့်အား (၂၁-၄-၂၀၂၀) ရက်နေ့၊ ည(၁၂)နာရီအချိန်မှ (၃၀-၄-၂၀၂၀) ရက်နေ့၊ ည(၁၂)နာရီအချိန်ထိ ခေတ္တယာယီပိတ်သိမ်းထားရန်၊ မန္တလေးတိုင်းဒေသကြီးအတွင်း ဟိုတယ်၊ မိုတယ်၊Innများ၊ ဆောက်လုပ်ရေးလုပ်ငန်းများ၊ အထည် ဆိုင်များအစရှိသည့်လုပ်ငန်းများအားလုံးကို ဧပြီလ ၂၁ ရက်နေ့မှ ဧပြီလ ၃၀ ရက်နေ့ထိ ခေတ္တယာယီပိတ်သိမ်းထားရန်၊ ပိတ်သိမ်းခြင်းမပြုပါက ဥပဒေအရအရေးယူခြင်းခံရမည်ဖြစ်ကြောင်းနှင့် မရှိမဖြစ်လိုအပ်သောစားသောက်ကုန်များရောင်းချနေသည့်လုပ်ငန်းများ၊ စားသောက်ကုန်ထုတ်လုပ်သည့်လုပ်ငန်းများ၊ ဆေးဝါးပစ္စည်းအရောင်းဆိုင်များ၊ ဆေးဝါး ထုတ်လုပ်သည့်လုပ်ငန်းများ၊ ပုဂ္ဂလိကဆေးရုံများ၊ စက်သုံးဆီဆိုင်များ၊ လျှပ်စစ်ဓာတ်အားပေးရေးလုပ်ငန်းများ၊ ဘဏ်များအစရှိသည့်လုပ်ငန်းများဖွင့်လှစ်ရမည်ဖြစ်ပြီး ဖွင့်လှစ်ခြင်းမပြုပါကလည်းဥပဒေအရ အရေးယူခြင်းခံရမည်ဖြစ်ကြောင်း မန္တလေးတိုင်းဒေသကြီးအစိုးရအဖွဲ့ အမိန့်အမှတ် (၅/၂၀၂၀) ကိုလည်း ထုတ်ပြန်ထားသည်။
မန္တလေးတိုင်းဒေသကြီးအစိုးရအဖွဲ့အနေဖြင့် မန္တလေးတိုင်းဒေသကြီးအတွင်း COVID-19 ရောဂါကူးစက်ပြန့်ပွားမှု မရှိစေရေးအတွက် ကာကွယ်၊ ထိန်းချုပ်၊ ကုသရေးလုပ်ငန်းများကို မိဘပြည်သူများနှင့်ပူးပေါင်း၍ အရှိန်အဟုန်မြှင့်ဆောင်ရွက်လျက်ရှိရာ မိဘပြည်သူများသို့ အသိပေးပန်ကြားခြင်း၊ မေတ္တာရပ်ခံပန်ကြားခြင်း၊ အသိပေးတင်ပြခြင်းအပြင် အခြေအနေပေါ်မူတည်၍ တားမြစ်အမိန့်များ ထုတ်ပြန်ခြင်းများကို အချိန်နှင့်တပြေးညီဆောင်ရွက်ပေးလျက်ရှိသည်။
