19/03/2026
Mormor Martha Flem (seinare Longva) poserer her for den kjende fotografen Anders Beer Wilse i Geiranger 1. juni 1937. På denne tida arbeidde ho på Union Hotell og tente for familien Mjelva.
I januar 1938 var Martha 24 år gammal, og utover denne våren gjekk ho på Lyngvin Husmorskule på Linge ved Valldal. Dette var ein skule som skulle "gje landsjenter i Møre fylke ei tidhøveleg praktisk og teoretisk opplæring på heilnorsk grunn til å stelle ein bondeheim så han vert godt, hyggeleg og billeg styrd".
I løpet av tida på husmorskulen skreiv ho alle oppskrifter dei gjekk gjennom inn i ei oppskriftsbok - denne er reine kulturskatten! Her er mykje som høyrest spennande ut, og ein del som ein kan stusse litt på. Kvifor skal det vere "litt sukker og støtt brød" på ein kålpudding, f.eks.? Mange oppskrifter er med margarin, der vi i dag ville brukt smør - eg hadde forventa meir bruk av smør i god bondekost.
Planen er å prøve ut nokre av oppskriftene i boka, både på kjøkkenet heime og på Gunnabuda - kva med "forloren and", f.eks.? (Denne retten inneheld altså ikkje and, men svinekjøt). "Forloren skilpadde" (som tilsvarande ikkje inneheld skilpadde...) er det også oppskrift på i boka - denne er eg meir usikker på, med ein kombinasjon av kalvekjøt og fiskebollar.
Eg deler her nokre tilfeldige sider frå boka (med oppskrifter på finsk mjød, forloren and og potet-terte) - god appetitt!
(For English readers: this is a photo of my grandmother Martha in 1937 + images from her recipe book from her months at a "housewife school" in 1938)
