03/08/2026
अचार तालिमको प्रलोभनमा घलेगाउँका ४२ महिला ठगिए, करिब ३५ हजार रुपैयाँ असुली
लमजुङको क्व्होलासोथार गाउँपालिका–३ स्थित पर्यटकीय घलेगाउँमा अचार बनाउने तालिम, उद्योग स्थापना र रोजगारीको प्रलोभन देखाएर स्थानीय महिलाहरूबाट करिब ३५ हजार रुपैयाँ ठगी गरिएको घटना सार्वजनिक भएको छ।
आफूलाई सुमन बस्नेत भनेर चिनाउने एक व्यक्ति काठमाडौंबाट घलेगाउँ पुगेर अचार उत्पादनसम्बन्धी तालिम सञ्चालन गर्ने, उत्पादनको बजारीकरण गरिदिने, स्थानीय कार्यालय स्थापना गर्ने तथा रोजगारीको व्यवस्था गर्ने आश्वासन दिँदै रकम सङ्कलन गरेपछि सम्पर्कविहीन भएका छन्।
वडाध्यक्ष आश्विर गुरुङका अनुसार तालिममा सहभागी गराउने भन्दै ४२ जनाबाट परिचयपत्र शुल्कका नाममा प्रतिव्यक्ति २०० रुपैयाँ उठाइएको थियो। साथै कार्यालयका लागि कर्मचारी नियुक्त गरी ड्रेस सिलाउने भन्दै प्रतिव्यक्ति ५ हजार रुपैयाँ अग्रिम लिइएको र पछि सामान खरिदका लागि थप १२ हजार रुपैयाँ समेत लिएर ती व्यक्ति फरार भएका हुन्।
घटनापछि पीडितहरूले जिल्ला प्रहरी कार्यालय लमजुङमा जानकारी गराएका छन्। प्रहरीका अनुसार आवश्यक प्रमाणसहित औपचारिक उजुरी दर्ता भएपछि घटनाको अनुसन्धान अघि बढाइनेछ।
स्थानीयले तालिम, रोजगारी वा व्यवसायका नाममा आउने अपरिचित व्यक्तिप्रति सतर्क रहन र सम्बन्धित निकायसँग यकिन गरेर मात्र आर्थिक कारोबार गर्न आग्रह गरेका छन्।
