02/05/2026
Editoryal: “Lawigan Bay View: Ang Tanawing Pilit Hinihila Pababa”
Sa bawat pagsikat ng araw sa Lawigan Bay, makikita ang likas na gandang kayang magbigay-buhay at inspirasyon sa sinumang tumatanaw. Ngunit sa kabila ng potensyal nitong maging simbolo ng kaunlaran at pagmamalaki, tila may mga puwersang patuloy na humihila rito pababa—minsan pa nga’y talagang sinasadya.
Hindi maikakaila na ang Lawigan Bay View ay may kakayahang maging sentro ng turismo at kabuhayan. Subalit paano ito uunlad kung ang mismong suliranin ay hinihila ito pailalim? Ang kakulangan sa disiplina ng ilan ay unti-unting sumisira sa likas nitong pagyabong. Ang masaklap, ang mga simpleng solusyon ay tila hindi mabigyang-pansin dahil sa kawalan ng pagkakaisa at malasakit.
May mga proyekto sanang inilaan para sa kaunlaran ng lugar, ngunit nauuwi sa pangamba. Sa halip na umangat, nariyan ang pagkalito at aligasyon ng pagkalugmok. Hangga’t may mga taong ganito, mananatiling pilit hinihila pababa ang Lawigan Bay View.
Panahon na upang baguhin ang takbo ng kwento. Hindi sapat ang paghanga sa ganda ng tanawin—kailangan itong samahan ng konkretong pagtutulungan at pagkakaisa para sama-sama natin iangat ang estado ng turismo sa ating lugar, makikilala at hangaan sa taglay nitong kagandahan.
Sa huli, ang tanong ay hindi kung may potensyal ba ang Lawigan Bay View—kundi kung handa ba tayong ipaglaban ito laban sa mga puwersang patuloy na humihila rito pababa. Ang pag-unlad ay hindi kusang darating; ito ay pinaghihirapan at pinangangalagaan. Kung hindi ngayon, kailan pa?
