15/11/2014
LUGAR KUN SAEN TAKA NANAGBUAN
(Gibo ni:Ma.Corazon Julia Binalla)
Talagang dae ko malingawan;
Kan aldaw na ika sakong nainyapan;
Sa lugar na ini na anas kakahuyan;
Sa tahaw kan kabuludan,harayo sa banwaan;
Sarong Babahe na sakuyang namotan;
Na makakaibanan ko sa sakong paggurang.
“Ika na talaga”,sabi ko, sadiri an kaulay;
Kan maheling taka na naglalangoy,solo lang;
Sulot mong pamparigos na kolor ponkan;
Na binagayan kan buhok mong natural;
Kublit mo daog pa an ubod batag sa kaputian;
Na urog na nagpakurutub-kutob kan sakong daghan.
Namate kong iguang nagtaragas sa sakuya;
Dae ko maaraman kun tano man baya?;
Digdi pa sa tungod kan kinatitindugan ko,garo sala;
Tayming man na maray,dudulukon ko na kuta;
Alagad pano?, makasupog baga helinga!;
Dae ako makahiro,buwiset sana!!!
Tulos akong nagbuntog,sa tubig ako nakubanan;
Sa sobrang lipot duman ako nakatagbang;
Namate ko nagtaragas man an sakong salang;
Nagkibig-kibig an ngabil ko sa kaliputan;
Si parteng nagtaragas sako kasubago lang;
Urog ining nagtagas kan kinaplog ko asin kaputan.
Kaya nagbalyo ako sa iguang nagpaparigos na gurang;
Pinili ko an an tubig na maimbungon na maray;
Pagbuntog ko duman,ayahay abang siram!
An ngabil kong nangingitom,kolor balik na sa normal;
Si parteng nagtaragas sako subago na iyo an”TABAY”;
Kan sakong hinapihap,malumuyon na ngonian!
Butwa tulos ako,paduman saiya, mayong kaiba;
Hinapot ko an pangaran asin numero kan cellphone niya;
Mayo akong maisip kun ano an maitatao ko saiya;
An naheling ko mga burak sa palibot,biyong namumula;
Naggutos akong tolo,ginibo ko na’ng lima,patago pa;
Ta bawal daa,nabasa ko sa dakulang karatula.
Puon kaidto, herak nin DIOS naging kami na;
Kaya kada “Monthsary”mi ,padulag sana;
Duman kami naghehelingan ,dawa amay pa;
Baduya ni Tiya Cely an balon mi,pantulod tubig sana;
Ngonian mag-agom na kmi,mga aki mi apat na;
Sa pagkakaminootan mi,PANICUASON parte ka!.
(Panicuason Hot Spring Resort and Nature Adventure Park iyo po
ni an sinasambitan sa Tula)
