10/04/2026
𝐁𝐀𝐒𝐀𝐇𝐀: Gisiguro ni Iligan City Mayor Frederick Siao sa Asenso Iliganon News program, Huwebes, Abril 9, ang tanan Iliganon ilabi na katong naapektaran sa tubig nga nagpadayon ang LGU sa pag-ayo sa mga tubo, ilabi na sa Brgy. Suarez.
Base sa update nga gihatag kaniya ni ICWS Officer-In-Charge Engr. Hubert Reyes, nakita nila nga adunay bag-ong mga cracks sa tubo nga maoy rason nga mi-leak o mi-tagas og usab.
Sa assessment, huyag na ang kalidad sa tubo nga gigamit ug subra na sa usa ka dekada. Dili haum ang klase sa tubo sa kakusgon sa pressure sa tubig, ilabi na nga duol kini sa source ug kinahanglan na ang rehabilitasyon o pag-ilis niini.
Nakit-an usab sa mga personnel sa ICWS nga adunay mga linya sa tubo nga dili maayo ang pagka-plastar nga naghinungdan sa sige og katay-og o mo-vibrate sa ilalom ilabi na kung moagi ang mga dagkong sakyanan.
Sumala ni Siao nga kinahanglan putlon ang apektadong parte sa tubo ug sudlan og tawo ang tubo aron masusi pag-ayo ug masiguro nga wala nay lain nga deperensya o liki.
Gihangyo usab niini ang tanan sa ilahang pagsabot ug kooperasyon, ug kung mahimong ablihan daan ang mga gripo aron malikayan ang airlock o pagka-trap sa hangin sulod sa tubo. | via Ritchie Mikin, RP Iligan
