03/07/2020
Stay at HOME!!!
Kahapon, ika -2 ng Hulyo, 2020, nakipag ugnayan ang Pasig Health Office gawa ng isang Confirmed COVID-19 case na kasalukuyang nasa Lumgsod ng Tagaytay. Siya ay residente ng Pasig at nagtratrabaho sa isang Ospital sa Valenzuela City ngunit simula ng GCQ, June 2, 2020 ay tumuloy na sa kanilang resthouse ng kanilang ina sa South Ridge Estate kasama ang kanyang pamilya. Siya ay malimit na nagbyabiyahe mula sa Tagaytay Patungong NCR at karatig probinsya ng Cavite. Base sa agarang imbestigasyon ng City Health Office, napag alaman na simula noong lumabas ang positive result ng naturang pasyente, sumailalim din ang kanyang pamilya sa swab test at kalauna’y napag alaman na dalawa pa sa kanyang pamilya ay positibo rin sa COVID-19. Agad na inabisuhan ng lokal na pamahalaan ang administration ng South Ridge Estate noon ding araw na iyon na isasailalim ang naturang subdivision sa lockdown base sa IATF protocols.
Dahil sa asymptomatic at mild ang mga sintomas ng mga naturang pasyente, base sa rekomendasyon ng DOH, maaari itong sumailalim sa home quarantine. Sila ay mahigpit na susubaybayan ng Barangay Health Emergency Response Team.
Noon pa man mula sa panahon ng ECQ hanggang GCQ, mahigpit ng pinapatupad ng Pamahalaang Lokal ng Tagaytay ang pagpasok ng mga hindi lehitimong residente ng Lungsod. Ang mga locally stranded individuals at maging mga OFW bagaman at tinatanggap sa lungsod ay dumadaan parin sa strict protocol na inilatag ng Local COVID-Taskforce alinsunod sa guidelines ng Inter Agency Task Force upang mapangalagaan ang kalusugan at kaligtasan ng mamamayan ng Tagaytay. Nagpadala rin ng City Memorandum noong nakaraang Mayo at sinundan pa nitong Hunyo ng memorandum sa mga subdivisions at condominiums ng lungsod na nag papaalala na pansamantalang hindi pinahihintulutan ang pagpasok ng mga hindi residente ng lungsod ganun din sa mga may ari ng vacation houses lalo na kung sila ay manggagaling sa mga lugar na may high risk of transmission ng COVID-19.
Hindi ito nasunod sa sitwasyon ngayon sa South Ridge Estate. Bagama’t pinaalalahanan na ng City COVID Task Force, may mga nakapasok parin ng walang pahintulot ang Barangay.
Bilang mitigation response ng lokal na pamahalaan ng Tagaytay, minabuti nitong isailalim ang South Ridge Estate sa lockdown hanggang masiguradong walang local transmission sa loob ng subdivision. Base sa pag uusap ng City Health Office, Barangay ng Sungay West at representative ng Home Owner’s Association, napagkasunduan na ang pangangailangang esensyal katulad ng pagbili ng mga pagkain at gamot ay tutugunan ng Pamahalaang Barangay ng Sungay West at ang food deliveries hanggang sa me entrada / gate ng southridge at pipick upin nalamang ng umorder habang ito ay nasa lockdown period. Pinapayagan parin ang mga magtratrabaho sa mga permitted establishment ng IATF ngunit nasa mahigpit ng health monitoring ng barangay. Ang mga transakyon sa bangko o remittance center ay kailangang sumangguni sa barangay para sa assistance. Ang mga health emergency cases ay pinahihintulutan sa ano mang oras.
Patuloy na dumarami ang kaso ng COVID-19 hindi lamang sa ating Lungsod. Kaya ang pamahalaang lokal ay nakikiusap sa kooperasyon ng lahat para sa kaligtasan ng pamayanan ng Tagaytay. Ang pagtutulungan ng bawat isa ay ang susi sa tagumpay ng ating laban sa pandemyang ito. Gabayan tayo ng Panginoon.
