Golaha Hal-abuurka Gurmad

13/01/2026

Erey fur

Clip: qurub
Vedeo clip: muuqaal gaaban(qurub)

06/11/2025

Hal wiig kaddib wada ay noqon doontaa madasha bandhigga buugga SOORANE oo ah buug qiimo badan lagana qoray suugaanta diinta.

Dhammaan bulshoweynta ku dhaqan caasimadda Hargeysa waxa aannu idinku casuumaynaa madashan qaaliga ah.

10/07/2025

Suugaanta iyo biyo fadhiisinka
--------------------------------------
1: haro

Inanyahay dannood baa u weyn harada doolloode.

Sida haro gim gimanoo
Guud ka xarfanaysiyo
biyo galax ka leeyiin

2: balli

Balliyada salkoodii
Iyo baaca webiyada
Marka boodh ka sare kaco

3: galsho

Allihii galshiyo baad
Ku ballaadhin jirayow

4: kal

Kal biyuhu galaanoo
Kob qurxoon ku taaliyo
Kaahii iftiimaay

5: dhijaan/jidhaan

Jidhaamaha xareedoo
Inta roobkuu xalay
Kuwo kale xarfanayaan.

6: qaydar ama qaydaro

Qaydar biyo galeenoo
Quruxdooda yaabka leh
Nooluhu qushuuceen.

7: war

Warta nabadu taalliyo
Deegaan nabdoonoo
Neecaw dhacaysiyo
Laydhu neefinaysaa
Noloshaba ku qurux badan.

8: gal

Gasiinkii la soo dhigay haddaad galiyo daad moodo.

9: qooqaar.

Qooqaarka biyo dhaca
Iyo qaw ku hoos yaal
Qunyar adiga oon galin
Ul baa lagu qotomiyaa.

10: gal galin

Gubad iyo gal galin iyo
Meel biyo galeenoo
Xooluhu ka giigeen.

Fiiro gaar ah:

Suugaanta qaarna waa mid abwaan h**e leeyihiin qaarna aniga ayaa ku qurxiyey.

Ku soo dara wixii aan ka tegay.

Qore: Xassan Barre Ducaale

23/01/2025

nabad iyo colaad.

nabaddu waxa ay leedahay intan oo isku qoofalan

nimco
naxariis
naq
naruuro
nafis
nasasho
neecaw
naawilid
negaansho
naaxid
nacfi
naddaafad
naash naash

colaaduna waxa ay leedahay

cadho
ciil
cadow
col
canaan
ciidan
cawaan
cay
cillad
cunsuriyad
cidla
cuqdad
catow
callaacal
ciqaab
caato
caloolyow
ciil-kaami
carasho iwm

gaal iyo islaamba nabaddu wow gogol nasteexaade.

qore: xassan barre ducaale

Send a message to learn more

26/08/2024

Berigii h**e, Reer Galbeedku iyagaa inoo iman jiray; si ay inoo addoonsadaan/gumaystaan. Immika se, innagaa u tagna, si ay inoo gumaystaan/shaqaystaan!

01/08/2024

Baahin!

Taxanaha la magac baxay Mahuraan oo ay ku kaydsan yihiin mawaadiicda faraha badan ee ay suugaanta Soomaalidu wax ka tidhi -- intii marba laga gaadhi karo, buuggiisii koowaad oo Soorane ah ayaa dhawaan soo bixi doona.
Soorane, waxa uu toos u abbaarayaa diinteenna suubban wixii ay suugaanta Soomaalidu ka tidhi wax ka mid ah. Ujeedka loo qoray taxanuhu waa in uu daboolo marba mawduuca uu khuseeyo, akhristahana kaga haqabtiro mawduucaas.

Soorane, dhawaan filo.

24/06/2024

Suugaanta badda iyo erey-bixin la xidhiidha badda.

Abwaan: xamse maxamed jaamac "hud hud".

28/05/2024

Falanqayn, faanbin, feedagis iyo fur-furis.

Waa doog iyo daaq

Waa derin iyo deris

Waa ris iyo roob

Waa rag iyo ra'yi

Waa dood iyo dabuub

Waa diris iyo dejin

Golaha Hal-abuurka Gurmad

Qore: xassan barre ducaale
Xubin: golaha gurmad

Hargeysa........2024ka

28/05/2024

Intan hoose kee baa sax ku ah muuqaalkan hoose

Salool

Saloolasho

Sariirasho

Lulis

26/05/2024

Family planing ama qorshaha qoyska
----------------------------

Soomaalidu waligeedba waa ay taqaanay qorshaha kala korinta ubadka ee dhanka xoolaha.

Tanna waa mid ka mid ah aqoontii baadiyaha, ee kala korinta iyo abaar ka badbaadinta idaha.

Qalabka yar, ee wanku hoosta ku wato deegaanada qaar waxa looga yaqaannaa "xammil".

Xammilku waxa uu wanka u diidaa inuu laxda ku boodo, isla markaana ay ilmo sidaas ku qaado iyada oo dhali karta xilli aan loo baahnayn oo abaar ah.

Idaha xilliga abaarta ah dhala ama xilligii loo qorsheeyey xilli ka horreeya dhala, waxa ay soomaalidu yidhaahdaan "way sumal xadeen".

Haddaba waxa sidan loo sameeyey, waa laba mid uun.

1: kala korin dhasha idaha iyo
2: badbaadinta laxda nafteeda, oo haddii ay xilli abaar ah dhasho, waxa ay ku riiqanaysa biyo la'aanta iyo baad la'aanta.

Fiiro gaar ah:

awrta iyo orgidu sida wananka maaha.

Qore: xassan barre ducaale
Xubin: Golaha Hal-abuurka Gurmad

Hargeysa......26...may....2024

25/05/2024

▪▪Hadal aan ereyo lahayn▪▪
------------------------------

Ma u malaynaysaa inuu jiro hadal aan ereyo lahayn?

Haa, oo waa laga yaabaa inaad is leedahay ma jira.

Haddaba, waxa jira hadal aan erayo lahayn waxaana ka mid ah

1: oohinta
2: dhawaaqa xayawaannada
3: urta cayayaanka.
4: guuxa iyo xarakaadka cayayaannada.
5: jabaqda kale duwan ee xoolaha.

Carruurtu marka ay baahdaan way ooyaan, marka ay xannuun dareemaanna way ooyaan, haddaba labaa jeer isku si uma ooyaan, hooyaduna way kala taqaannaa.

Waxa jira cayayaano ur sii daaya, marka ay dareemaan halis soo food saartay kooxda ama xerada ay ku nool ku yihiin, ogow oo urtaas iyo urta marka dagaalka ay ku jiraan isku mid maaha.

Cayayaanada urta sii daaya, ee isku af garta waxaa ka mid ah shinnida, sida oo kale shinnidu waxa ay samaysaa dhaq dhaqaaqyo ama xarakaad, sheega meesha ubaxa leh iyo meelaha loo guuri karo.

Sida oo kale riyuhu marka ay wax arkaan, waxa ay yidhaahdaan "bif", tani waa war gelin ku socota inta aan belada war ka hayn, waana hadal aan ereyo lahayn.

Si kastaba ha ahaatee tani waa awood rabbaani ah oo aan la dareensanayn dadka qaarna ayba u haystaan wax iska bilaa macne ah.

Awood oo idil ilaahay baa leh

Qore: xassan barre ducaale
Xubin: Golaha Hal-abuurka Gurmad
Hargeysa ......sanadka 25..may..2024ka

25/05/2024

Golaha gurmad, waa gole koriye oo kobciya sooyaalka iyo suugaanta soomaalida.

Golaha gurmad, waa gole kaba oo kal kaaliye afka soomaaliga iyo kasmada la xidhiidha.

Golaha gurmad, waa gole kaaba oo kacaamiye boqollaal dhallinyaro ah oo afka soomaaliga iyo tixda ka barta dugsiyada kale duwan ee ay ka hawl galaan xubnaha golaha gurmad.

Golaha gurmad, waa golaha kaliya ee xubnihiisu ay ka hawl galaan qaybaha waxbarashada ee kale duwan iyaga oo bixiya casharo ay ugu kaalin galsan tahay (tixda iyo tiraabtu). Bareyaasha golahan ka tirsanna waxa ay gaadhaan

Dugsiyo sare
Jaamacado iyo
Dugsiyo hoose.

Oo ay waagii dillaacaba ubaxa ku baraan (afka hooyo).

Golaha gurmad muddo gaaban waxa uu ku noqday dayax iftiimiyey degmo u baahnayd ilays.

Golahani guyaal kooban waxa uu ku gaadhay gobolo badan, waxa uuna magaciisu ku baahay ciidda soomaalidu ka dab shidato inteeda badan, waxa uuna taagan yahay heer ay waayeelo iyo wax garad badan ku soo hirtaan.

Golaha gurmad waa gole muujiyey awoodo iyo waxqabadyo ay dawladu ka gaabisay, waxa uuna buuxiyey dhacan u baahnayd buuxin iyo baanasho.

Gurmad waa dhalinyaro isu qalbi furan, isu laab furan, isu calool furan, oo uu hage u yahay damiirka xorta ah ee dadnimada toosan.

Golaha gurmada waxa ku midaysan halkaraano, karti, kasbasho, ka go'naan iyo kacaannimadu ka dhab tahay.

Gurmad waxa uu u taagan yahay

Golaha, Ururinta, raadraaca, maansada, afka iyo daryeelkiisa.

Waanna golaha kaliya ee maanta magac iyo muuqaal ahaanba u shaqeeya.

Waana golaha keliya ee ay taageereyaasha u yihiin abwaano waaweyn iyo dhaqan yaqaano aan xisaab lahayn oo ciidda soomaaliyeed caanka ka ah.

Gurmad waa gurmad waxa ayna u gurmanayaan

Dhaqanka
Dhaxalka
dhigaalka
Dhawrista
Dhisidda iyo
Dhaabista afka iyo soo saarista buuggaag la mahadiyo oo aan ahayn kuwo la soo min guuriyey.

Qore: xassan barre ducaale
Xubin: golaha gurmad