10/01/2023
Dag 1
Ons kan nie wag nie! Slaap amper niks, ons sien al so lank uit. Ons vertrek 5uur uit Kakamas, pad is lekker nat want dit het goed gereën die vorige nag. Ons ry die Lutzpits pad van Kakamas na Ariamsvlei. Ons gaan redelik gereeld oor die grens, so dinge gaan lekker vinnig by die grenspos. 'n Paar goed om te onthou as julle oor die grens wil gaan: Geen vleis mag oor die grens gaan nie, hulle is tans baie streng en die kans is baie groot dat hulle jou voertuig sal deursoek. Maak seker die kinders se underbridge sertifikate is in orde. Indien jou voertuig gefinansier is, mag hulle 'n bankbrief verlang alhoewel hulle nog nooit vir ons vir so iets gevra het nie. Maak seker jy betaal die road fund, want hulle vra vir die bewys by die padblokkades in Namibia.
Ons is deur die grenspos😅, ons maak brandstof vol op Ariamsvlei want brandstof is goedkoper in Namibia. Ons kry die res van die groep in Beta(hulle is Noordoewer oor), vriende het ons verwys om by At Kronenhof te oornag.
Mobi loop soos n droom, sy eerste groot trip vandat ons hom gekry het. Ek kan nie wag om weer op die grondpad te klim nie! Lang dag op die pad maar die scenary is ongelooflik mooi, die terrein verander heeltyd. Ariamsvlei-Karasburg-Grunau-Seeheim-Bethanie-Helmeringhausen-Betta
At Kronenhof slaan ons asems weg. Hier tussen niks en nêrens is so 'n ongelooflike plek. Dit is 'n moet vir enige kamper. Mens kan sien die persoon wat die staanplekke ontwerp het, is verseker self 'n kampeerder. Ons is eerste daar, ons drink solank 'n yskoue bier terwyl die kinders deur die swembad spring voor ons kamp opslaan. https://kronenhof.com.na/en/
