24/12/2023
🚨Hessequa Munisipaliteit doen 'n beroep op alle inwoners en toeriste binne die munisipale gebied om water asseblief spaarsamig te gebruik. As gevolg van 'n aansienlike toename in besoekers en toeriste tesame met stygende temperature, ervaar ons streek 'n oplewing in waterverbruik. Gevolglik word ons reservoirvlakke vinnig uitgeput, en dit is ‘n ernstige bedreiging vir ons watervoorsiening.
In die lig van hierdie kritieke situasie, versoek ons vriendelik dat alle inwoners en besoekers om hul waterverbruik aansienlik te verminder. Ons doen 'n beroep op u om die huidige druk op ons waterbronne in gedagte te hou en sodoende water spaarsamig en verantwoordelik te gebruik.
Neem asseblief kennis dat Hessequa Munisipaliteit reeds waterbeperkings in plek het, en dat wetstoepassing streng sal optree teenoor diegene wat die beperkings verontagsaam. Dit is van kardinale belang dat elke individu die beperkings respekteer en verbruik verminder om die druk op watervoorsiening te verlig.
Rapporteer oortredings van die waterbeperkings by jou naaste munisipale kantoor of by (028) 713 8000.
⚠️VLAK 2 WATERBEPERKINGS: GOURITSMOND, STILBAAI, MELKHOUTFONTEIN & RIVERSDAL
💧Tuine mag slegs twee keer per week tussen 17:00 en 18:00 natgemaak word. Ewe genommerde huishoudings mag hul tuine op Maandae en Donderdae natlei en ongelyke genommerde huishoudings op Dinsdae en Vrydae. Hierdie bepaling vervang alle vorige vergunnings vir die natmaak van tuine op ander tye.
💧Tuinslange, emmers, gieters en outomatiese besproeiingstelsels mag gebruik word om tuine nat te lei, mits dit binne die toegelate tydgleuf gebeur. Tuinslange mag slegs onder toesig gebruik word.
💧Die afspuit van verharde oppervlaktes soos plaveisel en sement oppervlaktes is verbode.
💧Die was van voertuie, karavane en bote mag slegs deur middel van ‘n emmer gedoen word.
💧Indien ander bronne soos reënwater tenks of boorgate gebruik word, moet dit op ‘n sigbare wyse aangedui word.
💧Ouetehuise, kwekerye, karwas besighede en kontrakteur dienste is uitgesluit by hierdie beperking.
💧Die lewering van munisipale dienste, wat sportfasiliteite en munisipale bates insluit, is uitgesluit by bogenoemde beperkings en sal op ‘n ad hoc basis bestuur word deur Administrasie.
💧Dit vervang vorige beperkings en is geldig vir Gouritsmond, Stilbaai, Melkhoutfontein en Riversdal.
💧Skriftelike versoeke vir die afspuit van huise se dakke met ‘n hoëdruk spuit sal slegs goedgekeur word indien die vlak van die Korentepoortdam (Riversdal) hoër is as 50% [hierdie is slegs van toepassing op Riversdal].
💧Die situasie in die verskeie dorpe sal gemonitor word en strenger beperkings ingestel word indien die toestand van waterbronne versleg.
💧Wetstoepassing sal die situasie in die dorpe monitor en streng teen oortreders optree.
⚠️VLAK 3 WATERBEPERKINGS: ALBERTINIA, HEIDELBERG, SLANGRIVIER, JONGENSFONTEIN & WITSAND
💧Tuine mag slegs een keer per week tussen 17:00 en 18:00 natgemaak word. Ewe genommerde huishoudings mag hul tuine op Dinsdae natlei en ongelyke genommerde huishoudings op Donderdae. Hierdie bepaling vervang alle vorige vergunnings vir die natmaak van tuine op ander tye.
💧Tuinslange, emmers, gieters en outomatiese besproeiingstelsels mag gebruik word om tuine nat te lei, mits dit binne die toegelate tydgleuf gebeur. Tuinslange mag slegs onder toesig gebruik word.
💧Indien ander bronne soos reënwater tenks of boorgate gebruik word, moet dit op ‘n sigbare wyse aangedui word.
💧Ouetehuise, kwekerye, karwas besighede en kontrakteur dienste word uitgesluit by hierdie beperking.
💧Die lewering van munisipale dienste, wat sportfasiliteite en munisipale bates insluit, is uitgesluit by bogenoemde beperkings en sal op ad-hoc basis bestuur word deur Administrasie.
💧Hierdie vervang vorige beperkings en is geldig vir Albertinia, Heidelberg, Slangrivier, Jongensfontein & Witsand.
💧Die situasie in die verskeie dorpe sal gemonitor word en strenger beperkings ingestel word indien die toestand van waterbronne versleg.
💧Wetstoepassing sal die situasie in die dorpe monitor en streng teen oortreders optree.
